Hordhac
Marka laga hadlayo hal-abuurnimada
iyo isbeddelka warshadaha casriga ah, magaca Henry Ford wuxuu ka mid
yahay kuwa aan marnaba la ilaawi karin. Waa ninkii ka dhigay baabuurta kuwo ay
heli karaan dadweynaha caadiga ah, halkii ay ka ahaan lahaayeen alaab gaar u ah
dadka taajiriinta ah. Sheekadiisu waa mid ka tarjumaysa adkaysi, fikir cusub,
iyo go’aan adag.
Henry Ford wuxuu ka mid yahay halyeeyada taariikhda casriga ah ee
beddelay jihada nolosha aadanaha. Magaciisu ma aha oo keliya astaan warshadeed,
balse waa tusaale muujinaya adkaysi, hal-abuurnimo, iyo aragti fog. Isaga ayaa
kacbiyay warshadaha baabuurta, isagoo ka dhigay gaari in uu noqdo mid ay dad
badan heli karaan—ma aha oo keliya kuwa taajiriinta ah.
Bilow
Nololeed Oo Fudud
Henry Ford wuxuu dhashay sanadkii 1863,
gobolka Michigan ee dalka Maraykanka. Wuxuu ku koray qoys beeraley ah, nolol
adagna waa uu la qabsaday yaraantiisii. Inkastoo qoyskiisu jeclaayeen inuu
noqdo beeraley, Ford wuxuu si gaar ah u jeclaa mashiinnada iyo qalabka
farsamada. Carruurnimadiisii, mar kasta oo qalab jabo, isaga ayaa isku dayi
jiray inuu hagaajiyo—taas oo muujisay hibadiisa mustaqbalka.
Guuldarrooyin
Badan Ka Hor Guul
Kahor inta uusan gaadhin guul, Henry
Ford wuxuu la kulmay fashil badan. Shirkado uu hore u furay way burbureen,
lacag badanna wuu waayay. Si kastaba ha ahaatee, Ford waligiis ma quusan. Wuxuu
aaminsanaa in fashilku yahay cashar, ee uusan ahayn dhammaad. Adkaysigaas ayaa
noqday furaha guushiisa dambe.
Aasaaska
Ford Motor Company
Sanadkii 1903, Henry Ford
wuxuu si rasmi ah u aasaasay Ford Motor Company. Ujeeddadiisu waxay
ahayd mid cad:
“Inaan sameeyo gaari tayo leh,
adkaysi leh, isla markaana qiimihiisu jaban yahay.”
Himiladaasi waxay beddeshay fikraddii
laga haystay baabuurta, waxayna furtay albaab cusub oo horumar ah.
Hal-abuurnimadii
Khadka Wax-soosaarka
Guusha ugu weyn ee Henry Ford waxay
timid markii uu hirgeliyay assembly line (khadka wax-soosaarka). Habkan
cusub wuxuu shaqada u kala qaybiyay hawlo yaryar, taas oo keentay in baabuurta
si degdeg ah loo sameeyo, kharashkooduna hoos u dhaco. Natiijadu waxay noqotay Model
T, gaari noqday mid caan ah oo ay malaayiin qof awoodaan.
Daryeelka
Shaqaalaha
Henry Ford wuxuu ka duwanaa
ganacsato badan oo xilligii uu noolaa. Wuxuu kordhiyay mushaharka shaqaalaha,
wuxuuna yareeyay saacadaha shaqada. Arrintani waxay kordhisay wax-soo-saarka,
waxayna shaqaalaha siisay nolol ka wanaagsan. Ford wuxuu fahmay in guusha
shirkaddu ku xirantahay farxadda iyo dadaalka shaqaalaha.
Saameynta
Dunida
Isbeddelkii Henry Ford ma uusan ku
ekaan warshadaha baabuurta oo keliya. Wuxuu saameyn ku yeeshay ganacsiga,
safarka, magaalooyinka, iyo qaabka nololeed ee aadanaha. Baabuurta ayaa noqday
aalad muhiim u ah horumarka dhaqaale iyo bulsho ee caalamka.
Casharro
Laga Baran Karo
Sheekada Henry Ford waxay na
baraysaa casharro muhiim ah:
- Adkaysi:
Guuldarrooyinka ha kuu noqdaan macallimiin.
- Hal-abuurnimo:
Ka fikir siyaabo cusub oo wax loo qabto.
- Aragti fog:
Haddii aad xaliso baahi dadweyne, guushu way imanaysaa.
- Daryeel bulsho:
Guushu way sii waaraysaa marka dadka kula shaqeeya aad qiimeyso.
Gunaanad
Henry Ford wuxuu ahaa nin ka yimid
nolol caadi ah, balse leh riyo aan caadi ahayn. Isagoo adeegsanaya adkaysi,
caqli, iyo hal-abuurnimo, wuxuu kabciyay warshadaha baabuurta, wuxuuna beddelay
nolosha malaayiin qof ah . Sheekadiisu waa dhiirrigelin muujinaysa in qof kasta oo doonaya inuu ka dhabeeyo
riyadiisa, inkastoo ay caqabado badan hor taagan yihiin, uu gaari karo guul
waarta.
0 Comments